تبلیغات
زیبایی های مراغه - استاد حیدر عباسی(باریشماز)

استاد حیدر عباسی(باریشماز)

استادحیدر عباسی شاعر توانای شهر مراغه که در اشعار خود باریشماز تخلص می کند نمونه یک انسان کامل بوده و این بزرگمرد به 6 زبان انگلیسی-فرانسه-روسی-عربی-ترکی و فارسی اشراف کامل دارند و در زمینه هنر نقاشی و خوشنویسی نیز جزو اساتید به شمار می روندوخالقٍ آثار ارزشمندی چون ترجمه مثنوی معنوی و نهج البلاغه به زبان ترکی می باشد همچنین شاعربیش از ده کتاب نفیس شعر ونمایشنامه ترکی نوشته است . باریشماز شاعر (نفرت ) نام دارد ودر تمام آثارش به این نکته اشاره کرده است در هر حال آثار باریشماز سرشار از فولکولورغنی اذربایجان است و استاد یحیی شیدا آثار وی را دایره المعارف ترکی میداند.درزیر دو اثراستاد تقدیم شما عزیزان می گردد.

 

 

عاشورا   اثر استاد حیدر عباسی(باریشماز)

مناعت ذیروه‌سینده بسله‌نن عنقادیر عاشورا
دؤشوندن طورلار باش قالدیران عنقادیر عاشورا

او زامان کی قان‌ایچنلر ایکیلیک آتشین یئلله‌ر
گرکدیر یئللره قاتسین ایکیلیک آتشین یئللر
اؤلوم میدانینی بیلسین شرافت بستری ائللر
عدالت نعشینین اوسته قوپان غوغادیر عاشورا

بو گون عذرای حریت عدالتله ائدر وصلت
عدالت بسله‌نن یئرده دایانامماز قاچار ذلت
یاریلار ظلمتین باغری، ایشیقدان کام آلار ملت
شهادت بویلوسون دوغدورماغا لعیادیر عاشورا

یارارسیزلار او زامان کی تاپار دیرناق سورر فرمان
شرف مرزین قوروماق‌ایچون چاغیرار بیزلری جانان
شهادت بیر قاتی یایدیر شیرین جانلار اونا پیکان
قوچاقلیق کلمه‌سینده گیزلنن معنادیر عاشورا

 

چیلله قووردو اثر استاد حیدر عباسی (باریشماز)

شاختادیر هاوانین الینده قیرمانج،
قورخودان اسیرلر زاغ-زاغ بوداقلار،
آغ کورکه بورونوب دره‌لر، داغلار،
توتوبلار داغلارا آینا شافاقلار.

گئجه‌نین قویوسو آچیبدیر آغزین،
گونشین آیاغی بودره‌ییر، باتیر،
سون ایشیق قویودان یوکسلن زامان،
اسنه‌ین داغلاردا مورگولور یاتیر.

چیلله‌قوودو ائدیر بو آخشام شهر،
آیی تک توستوده شاختا بوغولور،
داملارین اوستونده یانیر تونغاللار،
گئجه‌نین باغرینا خنجر سوخولور.

قیزیشارکن اوددا بالاجا قیزیم،
خیاللار قوینوندا اگلنجه قورور،
اوزونه یاییلیر ابهام اؤرتوسو،
گؤز تیکیر گؤزومه توموخور دورور.
 
سؤیله‌یین بیر گؤروم کیمدیر بو چیلله،
آلاودا یاندیریب تینده بوغورسوز؟
جوجه‌لر قانلیسی تولکودور مگر؟
یوواسین اوتلاییب ایتله قووورسوز؟

ناغدا تک باشینی تومارلایارکن،
سؤیلورم یوخ قیزیم، یانیلما آرتیق،
بو چیلله نه قورددور، نه ده تولکودور،
نه ده شر گیزله‌نن کؤهنه داغارجیق.

اوزونلو گئجه‌دن بئزیکن زامان،
خیاللار آتینی تومارلار انسان،
پیس گونون ائنینیدن بویوندان کسر،
قیسسالدار عؤمرونو بودارلار انسان.
 
پیس گونون عؤمورو اوزون اولسا دا،
خورسانیر، دیرده(؟) انسان اسگیدن.
سازاقدان، شاختادان آغیر نفرتین،
بئلنچی بیلدیریب انسان اسکیدن.

شاختانین قوینوندا، قاردا، بوراندا،
انتظار گؤزوموز یئنه یازدادیر،
دیدرگین بولبولون، تالانان یازین،
نغمه‌سی اورکده، سؤزو سازدادیر.

دؤزومون الیله انسان هر زامان،
کدرین اونودوب، دوگونون آچیب،
قیش عؤمرون دوغراییب، بودارلاماقدا،
حکمت‌لر گیزله‌نیب معنالار یاتیب.

یامانین دالینجا قیزیم هر زامان،
رسمیدیر چالینار بیر قارا بایداق،
معناسی بودور کی یامانین سسی،
سال آتدان اوجالسین، دؤنمه‌سین آنجاق،

آز یاشا، دوز یاشا سن ده عؤمرونده،
اومیدلر دینله‌دن اینجه بیر ساز اول،
اوزونلو قیش اولما، بئزدیریب یوران،
خلقیوه بیر گونلوک باهار اول، یاز اول.

بیر اوزون یاز اولسون، بیر اوزون ده قیش،
یاخشی‌یا، یاخشی اول پیسینن آتیش،
ناغیللار بزگی پریلر کیمی،
باتلاغا باتانین الیندن یاپیش،

ائله قایغی چکن آز دا یاشاسا،
ائل اونا ابدی حیات باغیشلار،
اوزالدار عؤمرونو آرزیلار کیمی،
آدینی سیلممز یاغان یاغیشلار.

داغ بویو کول اولما بیر آز سورمه اول،
گؤزللر گؤزونه یاخسینلار سنی،
یانگینان یاغ کیمی حق چیراغیندا،
اورکده یاشاتسین قالانلار سنی.

حیاتین اولماسین پولاد اؤز قیلینج،
شیمشک تک ظالیمین الینده شاخسین،
بیر گونلوک چیچک اول گؤزللر سنی،
سئوینجله قوپاریب، یاخایا تاخسین.

قورشون تک داملاما حسرت گؤزوندن،
گولوش اول دوداقدا غنچه تک آچیل،
یازلارا آداخلان چیچکلر کیمی،
پارلایان قندیل اول اورکدا آسیل.

قیش – ۱۳۶۳